JAIDAIKM

SSPP ပိုၼ်ၽၢဝ်ႇပိုတ်ႇပၢင်တိုၵ်းၸူး RCSS လူၺ်ႈလၢႆးတၢင်းငွၵ်း ၽွင်းၵူၼ်းမိူင်းတႆးတုၵ်းယွၼ်း ႁႂ်ႈၵိုတ်းပၢင်တိုၵ်းတေႃႇၵၼ်

Tuen Harn Media

May 25, 2021

မိူဝ်ႈပူၼ်ႉမႃး ဝၼ်းထီႉ 21.05.2021 ၼၼ်ႉ ဢိင်ၼိူဝ်တိုဝ်ႉတၢင်း ၼႂ်းဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်း ၶွပ်ႈၶူပ်ႇ(63)ပီသေ ၸင်ႇမီးၵေႃပွင်ၵၢၼ် ၽွမ်ႉႁူမ်ႈပီႈၼွင်ႉတႆး မိူင်းၵွၵ်ႇ ဢွၼ်ႁူဝ်ၼမ်းၼႃႈ ၸုမ်းတူင်ႇဝူင်းတႆး ၼွၵ်ႈမိူင်း ၼႂ်းမိူင်း ႁူမ်ႈၵၼ်ယိပ်းပၢႆႉတုၵ်းယွၼ်းထိုင် တပ်ႉသိုၵ်းၸိုင်ႈတႆး RCSS/SSA လႄႈ SSPP/SSA ႁႂ်ႈၵိုတ်းတိုၵ်းၵၼ်ဝႆးဝႆး ဝႃႈၼႆယဝ်ႉ။

ၵပ်းၵၢႆႇလူၺ်ႈလွင်ႈ ပၢင်တုၵ်းယွၼ်းၵိုတ်းတိုၵ်းၼႆႉသေ ၽူႈမၢႆ ၵေႃပွင်ၵၢၼ် ၽွမ်ႉႁူမ်ႈပီႈၼွင်ႉတႆး မိူင်းၵွၵ်ႇ ၸၢႆးသႅင်ႁၵ်ႉ လၢတ်ႈၵႂႃႇတီႈသိုဝ်ႇၶၢဝ်ႇ ၽူႈတွႆႇႁွၵ်ႈဝႃႈ "ယူႇတီႈၵၢင်ၸႂ် ပိႈၼွင်ႉတႆးႁဝ်းၶႃႈၵူႈမိူင်းမိူင်းတႄႉ ၶႂ်ႈႁႂ်ႈတပ်ႉသိုၵ်းတႆးႁဝ်း ႁူမ်ႈၵၼ်ပဵၼ် မူႇလဵဝ် ၸုမ်းလဵဝ်ၵၼ်ၼႃႇယဝ်ႉ။ သင်ဝႃႈ ပႆႇၸၢင်ႈႁူမ်ႈၵၼ်လႆႈ ၼႆၵေႃႈ ႁႂ်ႈလႆႈၵိုတ်းတိုၵ်းၵၼ်ဝႆးဝႆးသေၵမ်း။ ၵွပ်ႈဝႃႈ ၸုမ်းလႂ်ပဵၼ်ပၢင်တိုၵ်းၵၼ်မႃးမိူဝ်ႈလႂ်ၵေႃႈ ဢၼ်လႆႈၶၢမ်ႇၸၢၵ်ႇ (တၢမ်ႇ) မၼ်းၼႆႉ ပဵၼ်ပေႃႈမႄႈၵူၼ်းမိူင်းႁဝ်းၶိုၼ်းၵူၺ်း" ဝႃႈၼႆ။

ထိုင်ၼင်ႇဝၼ်းထီႉ 22.05.2021 ယၢမ်း 19.55 မွင်းၼၼ်ႉ ႁွင်ႈၵၢၼ်ၶွၼ်ႈတုမ်ပၢႆးမိူင်း ၶွင်ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ဢၼ်တႅမ်ႈဝႆႉ ၼႂ်းဝၼ်းထီႉ 21.05.2021 တင်းမူတ်းမီး (18) ၼႃႈ ၸႂ်ႉၸိုဝ်ႈႁူဝ်ၶေႃႈၽိုၼ်လိၵ်ႈၼၼ်ႉဝႃႈ "လွင်ႈၽွမ်ႉႁူမ်ႈ SSPP လႄႈ RCSS ဢမ်ႇၼၼ် လွင်ႈတၢင်း SSPP လႄႈ RCSS လႆႈပဵၼ်ပၼ်ႁႃၵၼ်မႃး" ၼႆၼၼ်ႉ ဢဝ်မႃးၽူတ်ႉလူင်း ၼႂ်းၼႃႈၾဵတ်ႉပုၵ်ႉၽဵၵ်ႇ SSPP Info လႄႈ ၼႂ်းၼႃႈဝႅပ်ႉသၢႆႉ SSPPSSA.org သေ တၢင်ႇၶိုၼ်ႈမႃးၼိူဝ်ဢွၼ်းလၢႆးယူႇယဝ်ႉ။

ၼႂ်းၽိုၼ်လိၵ်ႈၼၼ်ႉ သင်တေလႆႈမႃးႁုပ်ႈဢဝ်တီႈၵႅပ်ႈၵႅပ်ႈမၼ်းၸိုင် မၼ်းၶႂ်ႈမၢႆထိုင်ဝႃႈ -

1. ၼႄး RCSS ပဵၼ်ၶႅၵ်ႇသေ ပေႉၵိၼ်ၸဝ်ႈႁိူၼ်း။

2. ၼႄး RCSS လၵ်ႉၸိုဝ်ႈတပ်ႉသိုၵ်းၸိုင်ႈတႆး။

3. ၼႄး ၸဝ်ႈယွတ်ႈသိုၵ်း ပဵၼ်တပေးၶုၼ်သႃႇ။

4. ၼႄး RCSS ၸႂ်ႉသူဝ်ႇသႄႇမီႇတီႇယႃႇပဵၼ်ၶိူင်ႈမိုဝ်းသေ သႄႉၼႄးၸုမ်းၶဝ်။

5. ၼႄး ၸဝ်ႈယွတ်ႈသိုၵ်း ႁူမ်ႈမၢၼ်ႈသေ ပူၼ်ႉပႅၼ်ၼႃႈတီႈၶဝ်။

6. ၼႄး RCSS ဢဝ်လၢႆးၵူတ်ႉငွၵ်းသေ ႁႅမ်တၢႆၽူႈႁၢပ်ႇၵၢၼ်ၶဝ် လႄႈ ၵူၼ်းႁၼ်လီၶဝ်။

7. ၼႄး RCSS သၢင်ႈပၼ်ႁႃၸၢဝ်းၶိူဝ်း တႆး-ပလွင်ႈ။

8. ၼႄး RCSS ဢမ်ႇၶႂ်ႈသၢင်ႈ လွင်ႈၽွမ်ႉႁူမ်ႈတႄႉတႄႉ။

9. ၼႄး ၸဝ်ႈယွတ်ႈသိုၵ်း ဢမ်ႇၶႂ်ႈဢဝ် လုၵ်ႈတပ်ႉမၼ်းဝႃႈ ၼႆတႄႇၵႂႃႇၸိူဝ်းၼႆႉ သေ မိူဝ်ႈထိုင်မႃးတီႈ ၼႃႈလိၵ်ႈ 17 ပႅၵ်ႈ 2-3 ၼၼ်ႉ ဢဝ်ၶေႃႈဢၢင်ႈဝႃႈ "ၸဝ်ႈယွတ်ႈသိုၵ်း သိုပ်ႇၸႂ်ႉတိုဝ်းလၢႆးႁုၵ်းႁၢႆႉ ၶုၼ်သႃ သေ တေမႃးယႃႉပႅတ်ႈ SSPP ၶဝ်" ၼႆသေ ပၼ်ၾၢင်ႉတိူၼ်းထိုင် ၽူႈၵွၼ်းတပ်ႉၸုမ်း လႄႈ လုၵ်ႈတပ်ႉ ၼႂ်းတပ်ႉသိုၵ်း SSPP ႁႂ်ႈဢွၼ်ၵၼ်ႁၢင်ႈႁႅၼ်း ႁႂ်ႈတူဝ်ႈတၼ်း (24) ၸူဝ်ႈမွင်း ဝႃႈၼႆယဝ်ႉ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ သင်ႁဝ်းမႃးထတ်းထွင်တူၺ်း ထွႆႈၵႂၢမ်း ဢၼ်ၸႂ်ႉတိုဝ်းဝႆႉ ၼႂ်းၽိုၼ်လိၵ်ႈၼႆႉ လီလီၸိုင် ႁဝ်းတေလႆႈႁၼ် ၵမ်းၵမ်းၸႂ်ႉတိုဝ်းဝႃႈ "ယွတ်ႈသိုၵ်း ယွတ်ႈသိုၵ်း" လႄႈ "ယွတ်ႈသိုၵ်းဢွၼ်ႁူဝ်" ၼႆ သွၼ်ႉၵၼ်ဝႆႉ လၢႆပွၵ်ႈလၢႆၵမ်းယူႇ။ မၢင်တီႈၵေႃႈ ၸႂ်ႉထွႆႈၵႂၢမ်းဝႃႈ "ယွတ်ႈသိုၵ်း ဢမ်ႇထွမ်ႇၶေႃႈၵႂၢမ်း ၽူႈတၢင်တူဝ်မၼ်းသေ ၶႂ်ႈဢဝ်မၼ်းဝႃႈ ႁင်းၵူၺ်းၵေႃႉလဵဝ်" ၼႆတႄႇၵႂႃႇၸိူဝ်းၼႆႉယဝ်ႉ။

ပိူင်တႅၵ်ႈမၼ်း သင်ႁဝ်းၵႂႃႇတူၺ်းတီႈ ၼႃႈလိၵ်ႈ 4 ပႅၵ်ႈ 2 တူၼ်ႈထႅဝ်ၵမ်းလိုၼ်းသုတ်း ဢၼ်ၵႂႃႇယူႇၼႂ်း ၼႃႈလိၵ်ႈ 5 ၼၼ်ႉ တေတႅမ်ႈဝႆႉဝႃႈ "RCSS ၸၼ်ႉၸုမ်းၽူႈတၢင်တူဝ် ႁၼ်လီၸွမ်း SSPP ၶဝ် တႃႇတေဢဝ်သိုၵ်း ထွႆဢွၵ်ႇၼႂ်းမိူင်းတႆးပွတ်းႁွင်ႇယဝ်ႉ ၸင်ႇဢုပ်ႇလွင်ႈၽွမ်ႉႁူမ်ႈၵၼ် ၼႆသေတႃႉ ၵွပ်ႈၸဝ်ႈယွတ်ႈသိုၵ်း (ၵေႃႉလဵဝ်) ဢမ်ႇႁၼ်လီၸွမ်းလႄႈ ဢမ်ႇၸၢင်ႈလႆႈၶေႃႈတူၵ်းလူင်းသင်ၵၼ် မႃး" ဝႃႈၼႆ။

လွၵ်းလၢႆးၽႅၼ်ၵၢၼ် (ပိဝ်ႇႁႃႇ ၊ ယုတ်းထသၢတ်ႇ) ဢၼ်ၼႆႉ ၼႂ်းၵႂၢမ်းဢင်းၵိတ်ႉၶဝ်တႄႉ ႁွင်ႉဝႃႈ Divide and Rule - ၸႅၵ်ႇၽႄယဝ်ႉဢုပ်ႉပိူင်ႇ ၼႆယဝ်ႉ။ ၶႂ်ႈမၢႆထိုင်ဝႃႈ ၼႂ်းၽိုၼ်လိၵ်ႈ ၶွင် SSPP ၶဝ်တႅမ်ႈၼႄမႃး တင်းမူတ်း (18) ၼႃႈၼႆႉ ၽၢႆႇၼိုင်ႈ ပဵၼ်တႃႇၵၢဝ်ႇၼႄးတၢင်းၽိတ်းသႂ်ႇ ၸုမ်း RCSS ႁႂ်ႈၵူၼ်းသိုၵ်း SSPP ၶဝ် ႁၼ်လီၵမ်ႉထႅမ်ၸွမ်းၶဝ် လႄႈ ႁႂ်ႈမီးႁႅင်းၸႂ် ၶႂ်ႈပိုတ်ႇၼႃႈသိုၵ်း တိုၵ်းယိုဝ်း ၵူၼ်းသိုၵ်း RCSS ယဝ်ႉ။

ထႅင်ႈၽၢႆႇၼိုင်ႈသမ်ႉ မီးယိူင်းဢၢၼ်း ၶႂ်ႈၸတ်းထႅၵ်ႇ ၸႅၵ်ႇယႃႉဢဝ် ၽူႈၵွၼ်းတပ်ႉၸုမ်း လႄႈ ၽူႈယႂ်ႇၵူၼ်းလူင် ဢၼ်ယူႇၼႂ်းၸုမ်း RCSS လႄႈ ႁူဝ်ပဝ်ႈလူင် ၸဝ်ႈယွတ်ႈသိုၵ်း ႁၼ်ၽိတ်းႁၼ်ပိူင်ႈ တီႈၼိူဝ်ၵၼ်။ ဢၢၼ်းၸႂ်ႉတိုဝ်း ထွႆႈၵႂၢမ်းသေ ထႅၵ်ႇယႃႉ ႁႂ်ႈၽူႈၵွၼ်းတပ်ႉၸုမ်း လႄႈ ႁူဝ်ပဝ်ႈလူင် ၸဝ်ႈယွတ်ႈသိုၵ်း တႅၵ်ႇငၢၵ်ႈၵၼ် ၼၼ်ႉယဝ်ႉ။

လၢႆးၽႅၼ်ၵၢၼ် ၸႅၵ်ႇၽႄယဝ်ႉဢုပ်ႉပိူင်ႇ Divide and Rule ၼႆႉ ၸဝ်ႈသိုၵ်း ၸဝ်ႈႁၢၼ်ၶဝ်၊ ၸဝ်ႈၵၢၼ်မိူင်းၶဝ်ၸိူဝ်းၼႆႉ ပိူၼ်ႈႁူႉၵၼ်ၵူႈၵေႃႉယဝ်ႉ။ လၢႆးဢၼ်ၼႆႉ မၼ်းပဵၼ်လၢႆးမၢၼ်ႈ ဢဝ်မႃးၸႂ်ႉတိုဝ်း ၼႂ်းမိူင်းတႆး ႁႂ်ႈၸၢဝ်းၶိူဝ်း ၼႂ်းမိူင်းတႆး လႄႈ ၵူၼ်းၶိူဝ်းတႆး တႅၵ်ႇၵၼ်။ ၵမ်းလိုၼ်း ႁႂ်ႈတႆးၼင်ႇၵၼ်တႅၵ်ႇၵၼ် ယိုဝ်းၵၼ်ၶိုၼ်းၵေႃႈ ပဵၼ်လၢႆးဢၼ်ၼႆႉယဝ်ႉ။ လၢတ်ႈသိုဝ်ႈသိုဝ်ႈၵေႃႈ ဢၼ်တႆးသွင်ၸုမ်း လႆႈတိုၵ်းၵၼ်ယူႇၼႆႉ ၵွပ်ႈၸုမ်းတႆး ၽၢႆႇလႂ်ၽၢႆႇၼိုင်ႈ တူၵ်းယူႇဝႆႉ ၼႂ်းလွၵ်းၽႅၼ်ၵၢၼ် ၸႅၵ်ႇၽႄယဝ်ႉဢုပ်ႉပိူင်ႇ Divide and Rule ၶွင်မိၼ်းဢွင်ႇလၢႆႇ ၼၼ်ႉယဝ်ႉ။

ၸိူင်ႉႁိုဝ်ၵေႃႈလီ ဢၼ်ၸုမ်း SSPP ၶဝ် ၵၢဝ်ႇၼႄးဝႃႈ RCSS ပဵၼ်ၶႅၵ်ႇ ပေႉၵိၼ်ၸဝ်ႈႁိူၼ်းၼႆၼၼ်ႉ ဢမ်ႇမီးၵူၼ်းမိူင်းတႆးၵေႃႉလႂ် ႁပ်ႉၶၢမ်ႇလႆႈ။ သင်ၼႄးဝႃႈ မၢၼ်ႈပဵၼ်ၶႅၵ်ႇ ပေႉၵိၼ်ၸဝ်ႈႁိူၼ်း ၼႆတႄႉၵေႃႈ သင်ႇၶႃႇလႄႈပေႃႈမႄႈၵူၼ်းမိူင်းတႆးႁဝ်း ၽႂ်တေဢမ်ႇထဵင်လႆႈ။

ဢၼ်ၼႄးဝႃႈ RCSS လၵ်ႉဢဝ်ၸိုဝ်ႈတပ်ႉသိုၵ်းၸိုင်ႈတႆး SSA ၸႂ်ႉတိုဝ်းၼႆၼၼ်ႉ ဢမ်ႇမၢၼ်ႇမႅၼ်ႈလႃးလႃး။ SSA ၼႆႉ ပဵၼ်ၸဝ်ႈၼၢင်းႁိူၼ်းၶမ်း ႁွင်ႉသိုၵ်းတႆး ၵူႈမူႇၵူႈၸုမ်း ဢၼ်မီးၸိုဝ်ႈပႅၵ်ႇပိူင်ႈၵၼ်ဝႆႉတင်းၼမ်ၼၼ်ႉသေ ႁႂ်ႈမႃးႁူမ်ႈၵၼ်တၢင်ႇၸိုဝ်ႈဝႃႈ SSA ၼႆၼၼ်ႉၵူၺ်း။ ၵွပ်ႈၼႆလႄႈ SSA ၼႆႉ ၽႂ်ဢဝ်ၸႂ်ႉတိုဝ်းၵေႃႈလႆႈ။ ထႅင်ႈပိူင်ၼိုင်ႈၵေႃႈ SSA ဢၼ်ဝႃႈၼႆႉ မၼ်းပဵၼ်ၸိုဝ်ႈ (ပၺ်ၺၢတ်ႈ) တၢင်ႇဢဝ်မွၵ်ႈၼၼ်ႉၵူၺ်း။ ၵွပ်ႈမၼ်းပဵၼ်ၸိုဝ်ႈၵူၺ်းလႄႈ တေလႆႈဝႃႈ ပဵၼ်ၼၢမ်ႇ (ၼႃႇမ) လၢႆလၢႆၵူၺ်း။ ဢမ်ႇမၼ်ႈၵိုမ်း။

တႃႇတိုၵ်းဢဝ်ၶိုၼ်း လွင်ႈထၢင်ႇႁၢင်ႈတႆးၼႆႉ ဢမ်ႇၸႂ်ႈဝႃႈ ဝႆႉၸိုဝ်ႈပဵၼ်ပိူင်လူင်၊ ႁဝ်းလူဝ်ႇဝႆႉၼမ်ႉၵတ်ႉ လႄႈ လွင်ႈၽွမ်ႉႁူမ်ႈ ပဵၼ်ပိူင်လူင်ၵူၺ်း။ ဢမ်ႇၸႂ်ႈ ဢဝ်ၸိုဝ်ႈ ပဵၼ်ပိူင်လူင်။ မႅဝ်းလမ်ၵေႃႈယဝ်ႉ၊ မႅဝ်းၶၢဝ်ၵေႃႈယႃႇ လူဝ်ႇႁႂ်ႈမၼ်း မေႃၺွပ်းၼူၵူၺ်း။

ဢၼ်ၼႄးဝႃႈ ၸဝ်ႈယွတ်ႈသိုၵ်း ပဵၼ်တပႄးၶုၼ်သႃႇၼႆၼၼ်ႉ မိူဝ်ႈၽွင်း ၶုၼ်သႃ ၶိုၼ်ႈပုတ်ႈတႅၼ်း တီႈၼင်ႈၸဝ်ႈၵွၼ်းၸိူင်း သေ ပဵၼ်ႁူဝ်ပဝ်ႈ MTA ၼၼ်ႉတႄႉ ၶႂ်ႈၸႂ်ႈၵေႃႈတေၸႂ်ႈယူႇ။ ၵူၺ်းၵႃႈ ယၢမ်းၼႆႉ ၶုၼ်သႃႇၵေႃႈ ဢမ်ႇမီးယဝ်ႉ။ ၼႂ်းတူင်ႇဝူင်းတႆးၵေႃႈ ဢမ်ႇမီးၽႂ်လၢတ်ႈထိုင်ယဝ်ႉ။ ၼႂ်းမၢၼ်ႈၵေႃႈ ဢမ်ႇမီးၽႂ်ၶုၵ်းၸႂ်လႆႈယဝ်ႉ။ ၵွပ်ႈသင် လွင်ႈသင်လႄႈ ၸုမ်း SSPP ၶဝ်သမ်ႉ ဢဝ်ဢွၵ်ႇမႃးၸႂ်ႉတိုဝ်းၶိုၼ်း။ ၵွပ်ႈသင်လႄႈ ဢဝ်ဢွၵ်ႇမႃးသမ်ႉၶိုၼ်း။

ၵႃႈတီႈၼႆႈ သင်ၸဝ်ႈယွတ်ႈသိုၵ်း ဢမ်ႇၶႂ်ႈလႆႈလွင်ႈၽွမ်ႉႁူမ်ႈပေႃးၼႆ မိူဝ်ႈၶုၼ်သႃႇ ဝၢင်းၶိူင်ႈပၼ်မၢၼ်ႈၼၼ်ႉ မၼ်းတေဢွၼ်ဢဝ်လုၵ်ႈသိုၵ်းမၼ်း မိူဝ်းၸူးပွတ်းႁွင်ႇႁဵတ်းသင်။ ယွၼ်ႉ ၸဝ်ႈယွတ်ႈသိုၵ်း ၶႂ်ႈသၢင်ႈလွင်ႈၽွမ်ႉႁူမ်ႈ တႆးတေႃႇတႆး လႄႈ ၸင်ႇဢမ်ႇၶၢမ်ႇဝၢင်းၶိူင်ႈၸွမ်းၶုၼ်သႃႇသေ ၶၢမ်ႇပိုၼ်ႉပွႆႇပႅတ်ႈ လွင်ႈၶုၼ်သႃႇတၢင်းမူတ်းသေ မိူဝ်းထိုင်ပွတ်းငဝ်ႈငုၼ်းသႅင်ၵႅဝ်ႉ၊ မိူဝ်ႈႁွင်ႉႁႃ ၸုမ်းယိပ်းၵွင်ႈၵၢင်ႇတႆး ဢၼ်ဢဝ်ငၢမ်းယဵၼ်ၵၼ်တင်းမၢၼ်ႈ မိူၼ်ၼင်ႇ SSPP, SSNA ၸိူဝ်းၼႆႉသေ ယွၼ်းႁူမ်ႈပွင်းၸွမ်းၵၼ်ၵမ်းၼိုင်ႈယဝ်ႉ။

မိူဝ်ႈၽွင်းၼၼ်ႉ ၵွပ်ႈၸုမ်းၶဝ် လွမ်ၵူဝ်ၵႂၢမ်းလွၵ်ႇသိုၵ်းမၢၼ်ႈဝႃႈ "ႁူမ်ႈၵၼ်တင်းယွတ်ႈသိုၵ်းတူၺ်းလႄႈ ႁဝ်းတိုၼ်းတေလိုပ်ႈတိုၵ်းၸုမ်းသူ ၵူႈမူႇၵူႈၸုမ်းယဝ်ႉ" ၼႆသေ ၸင်ႇတွပ်ႇဝႃႈ "ဢမ်ႇၸၢင်ႈႁူမ်ႈၸွမ်းယဝ်ႉ" ၼႆမႃး ဢမ်ႇၸႂ်ႈႁိုဝ်။ ၵွပ်ႈၼၼ်လႄႈ ၸဝ်ႈယွတ်ႈသိုၵ်း ၸင်ႇလႆႈဢွၼ်ၵူၼ်းသိုၵ်းမၼ်း ၶိုၼ်းလူင်းမႃးပွတ်းၸၢၼ်းသေ မႃးတင်ႈငဝ်ႈၸိုင်ႈလွႆတႆးလႅင်း ဢၼ်ႁဝ်းလႆႈႁၼ်ၵၼ်ယူႇ ၼႂ်းဝၼ်းမိူဝ်ႈၼႆႉၼၼ်ႉယဝ်ႉ။

ဢၼ်ၵၢဝ်ႇၼႄးဝႃႈ RCSS ၸႂ်ႉတိုဝ်း လၢႆးၵူတ်ႉငွၵ်းသေ ႁႅမ်တၢႆၵူၼ်းႁၢပ်ႇၵၢၼ်ၶဝ်ၼႆၼၼ်ႉ လုင်းႁဵင် သႅင်ႁၢၼ်ႇ ဝၢၼ်ႈၵုင်းသႃႇ ဝဵင်းသီႇပေႃႉၼၼ်ႉ ပဵၼ်ၸုမ်းလႂ်ၵေႃႉယိုဝ်းတၢႆၼႆ ဢမ်ႇလၢတ်ႈၼႄၵေႃႈ ၵူၼ်းမိူင်းတႆး ႁူႉႁၼ်ၵၼ်ၵူႈၵေႃႉယဝ်ႉ။ လုင်းႁဵင် သႅင်ႁၢၼ် ဝၢၼ်ႈၵုင်းသႃႇ သီႇပေႃႉၼႆႉ ပႆပဵၼ်ၽူႈႁၢပ်ႇၵၢၼ် ၼႂ်းၸုမ်း SSPP မႃးပီယၢဝ်းၶၢဝ်းႁိုင် ဢမ်ႇၸႂ်ႈၶႃႈႁိုဝ်။ ၵွပ်ႈသင်လႄႈဢဝ်တၢႆ ဢၼ်ဝႃႈၼၼ်ႉ ယွၼ်ႉမီးယိူင်းဢၢၼ်း ၶႂ်ႈႁႂ်ႈၵူၼ်းဝၢၼ်ႈၵူၼ်းမိူင်း ႁၼ်ၽိတ်းႁၼ်ပိူင်ႈ ၼိူဝ် RCSS လႄႈ ၸင်ႇလႆႈၶၢမ်ႇယွမ်းသုမ်း ၵူၼ်းႁၢပ်ႇၵၢၼ်ၽၢႆႇ SSPP သေ ယိုဝ်းတၢႆ ၼၼ်ႉယဝ်ႉ။ ဢၼ်ၼႆႉ မၼ်းပဵၼ်လၢႆးၵူၼ်းတေႃႇလွၵ်းၵႆႇၵၼ် မိူၼ်ၼင်ႇ ၶၢမ်ႇပၼ်ပိူၼ်ႈၵိၼ် ၽၢႆႇႁဝ်းၼိုင်ႈတူဝ် ႁဝ်းၶိုၼ်းၵိၼ်ၽၢႆႇၶဝ် သွင်သၢမ်တူဝ် ၼႆၼၼ်ႉၵူၺ်း။ လွၵ်းလၢႆးၸိူဝ်းၼႆႉ သိုဝ်ႈၼႃႇ ယူဝ်းၼႃႇယဝ်ႉ။

ဢၼ်ၵၢဝ်ႇၼႄးဝႃႈ ၸုမ်း RCSS သၢင်ႈပၼ်ႁႃၸၢဝ်းၶိူဝ်း တႆး-ပလွင်ႈ ဢၼ်ဝႃႈၼၼ်ႉ မိူဝ်ႈသၢႆသိုၵ်း 701 ၼႃႈတီႈၼမ်ႉၶမ်း မႃးၶိုၼ်ႈပၢင်သပ်းလႅင်း လွင်ႈလူင်းလၢႆးမိုဝ်း NCA တီႈငဝ်ႈၸိုင်ႈလွႆတႆးလႅင်းသေ ပွၵ်ႈမိူဝ်းၶိုၼ်းပွတ်းႁွင်ႇ တီႈယူႇၵဝ်ႇၶဝ်ၼၼ်ႉ သိုၵ်းတဢၢင်း TNLA ၶဝ်သမ်ႉ ဢဝ်ဢဵၼ်ႁႅင်းသိုၵ်းတင်းၼမ်သေ ပႂ်ႉမူၵ်းယိုဝ်း ၼႂ်းၸႄႈဝဵင်းမၢၼ်ႈတူင်ႈဢွၼ်တၢင်းၼၼ်ႉလူး ၽၢႆႇ SSPP သူ တေတွပ်ႇဝႃႈႁိုဝ်။ တီႈတႄႉမၼ်း မိူဝ်ႈပႆႇဢွၵ်ႇတၢင်းလတ်းၽၢၼ်ႇ ၶၢမ်ႈမိူဝ်း ၼႂ်းပိုၼ်ႉတီႈမၢၼ်ႈတူင်ႈၼၼ်ႉ ၽၢႆႇ RCSS လႆႈပွင်ႇလႅင်းထိုင်လႄႈယွၼ်းၶႂၢင်ႉ လတ်းၽၢၼ်ႇ ၼႂ်ႈၼႃႈတီႈမၢၼ်ႈတူင်ႈၼၼ်ႉ ဢွၼ်တၢင်းယဝ်ႉ။ ၵွပ်ႈႁူႉ သၢႆသဵၼ်ႈတၢင်း RCSS တေမႃးလႄႈ ၸင်ႇလႆႈလၵ်ႉမႃးပႂ်ႉမူၵ်းယိုဝ်း သၢႆသိုၵ်း RCSS ဢမ်ႇၸႂ်ႈႁိုဝ်။ ၵပ်းၵၢႆႇလူၺ်ႈလွင်ႈ ပၼ်ႁႃၸၢဝ်းၶိူဝ်းၼႆႉသေ ၸုမ်း RCSS ၶဝ် တိုၼ်းမီးဝႆႉပေႃႇလၸီႇ သၢင်ႈလွင်ႈၽွမ်ႉႁူမ်ႈၸၢဝ်းၶိူဝ်း လႄႈ တိုၼ်းတူဝ်ႈတၼ်း တႃႇဢုပ်ႇၵုမ်ၵၼ်တင်း ၸၢဝ်းၶိူဝ်း တႃႇသေႇ။ ၵူၺ်းၵႃႈ ၽၢႆႇၸၢဝ်းၶိူဝ်းၵူၺ်းလူး ဢၼ်ဢမ်ႇၶၢမ်ႇမႃးယွမ်းဢုပ်ႇၸွမ်း ၸုမ်း RCSS

#ၶေႃႈႁုပ်ႈၵႅပ်ႈ

RCSS ဢမ်ႇၸႂ်ႈၸဝ်ႈၶႅၵ်ႇ၊ RCSS ဢမ်ႇၸႂ်ႈ ၸုမ်းသိုၵ်းၶႂ်ႈဢဝ်ပႄႉပုၼ်ႈပိူၼ်ႈ၊ RCSS ဢမ်ႇလႆႈပူၼ်ႉပႅၼ်ၼႃႈတီႈ၊ RCSS ဢမ်ႇလႆႈႁူမ်ႈမိုဝ်းမၢၼ်ႈ ၸိူင်ႉၼင်ႇၵႂၢမ်းၵၢဝ်ႇၼႄးၼၼ်ႉလႃးလႃး၊ RCSS ဢမ်ႇတွၼ်ႉပိုတ်ႇၼႃႈသိုၵ်းၸူး ၸုမ်းၸၢဝ်းၶိူဝ်းၸုမ်းလႂ်ဢွၼ်တၢင်း လႄႈ ဢမ်ႇတွၼ်ႉပိုတ်ႇၼႃႈသိုၵ်းၸူး တႆးတေႃႇတႆး မိူၼ်တႆးမၢင်ၸုမ်း ဢဝ်ဢဵၼ်ႁႅင်း 300 သေ ဝႅတ်ႉလွမ်ႉပိုတ်းယိုဝ်း ၸုမ်း RCSS ဢၼ်မီးႁႅင်းၵူၼ်း 24-25 ၵေႃႉၼၼ်ႉလႃးလႃး။ RCSS ဢမ်ႇလႆႈယိပ်းတိုဝ်းဝႃႇၻ ၵူၼ်းၶိူဝ်းယႂ်ႇ။ RCSS ဢမ်ႇၸႂ်ႈၶွမ်ႇမိဝ်ႇၼိတ်ႉ။ RCSS တိုၼ်းဝႆႉၵူၼ်းၵူႈၸၢဝ်းၶိူဝ်း ၽဵင်ႇပဵင်းမိူၼ်ၵၼ်မူတ်းၵူၺ်း။ RCSS ဢမ်ႇယၢမ်ႈဢွၵ်ႇလိၵ်ႈပိုၼ်ၽၢဝ်ႇ သႄႉၼႄးၸုမ်းလႂ်။ RCSS ဢမ်ႇလႆႈတိၺွပ်းၵူၼ်းသိုၵ်းၸဝ်ႈၵဝ်ႇသေ ပၼ်မၢၼ်ႈ။ ၵူၺ်းၵႃႈ RCSS တိုၼ်းတေတိၺွပ်း ၵူၼ်းၵႃႉယႃႈမ ယႃႈၽိၼ်ႇ လႄႈ ၵူၼ်းၵိၼ်ယႃႈမ ယႃႈၽိၼ်ႇ ၸိူဝ်းၼႆႉယဝ်ႉ။

မိူဝ်ႈၽွင်း ၵူၼ်းဝၢၼ်ႈၵူၼ်းမိူင်း ဢွၼ်ၵၼ်တုၵ်းယွၼ်း ႁႂ်ႈၵိုတ်းတိုၵ်းၵၼ်ယူႇၼၼ်ႉ ၽၢႆႇ SSPP သမ်ႉ ဢိင်ဢဝ်တိုဝ်ႉတၢင်း ၼႂ်းဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်း ၶွပ်ႈၶူပ်ႇ(63)ပီသေ ဢဝ်လူင်းမႃးၼိူဝ်ၾဵတ်ႉပုၵ်ႉၽဵၵ်ႇ လႄႈ ဝႅပ်ႉသၢႆႉၼၼ်ႉ မၼ်းပွင်ႇဝႃႈ လၵ်ႉပိုၼ်ၽၢဝ်ႇပိုတ်ႇၼႃႈသိုၵ်းၸူး RCSS လူၺ်ႈလၢႆးငွၵ်း (လူၺ်ႈတၢင်းဢွမ်ႈ) လူၺ်ႈဢမ်ႇထွမ်ႇသဵင်ႁူဝ်ၸႂ် ၵူၼ်းမိူင်း ဢၼ်တုၵ်းယွၼ်း ႁႂ်ႈၵိုတ်းတိုၵ်းၼၼ်ႉၵူၺ်းၼႆ ၶႂ်ႈသပ်းၸႅင်ႈၼႄ ပေႃႈမႄႈပီႈၼွင်ႉ ၸၢဝ်းၶိူဝ်း ၼႂ်းမိူင်းတႆးႁဝ်းၶႃႈ မီးၼင်ႇၼႆယဝ်ႉ။

#RCSS #SSPP #SSPPAnnouncement